இவையெதுவும்

முன்பின் அறியாத யாரோ
தலைசாய்க்கத் தோள் கொடுக்கும்
நேசம்.

அம்மாவின் சேலையைப் பிடித்துக்கொண்டு
தூங்கி வழியும் சிறுபிள்ளைக்கு கொஞ்சம்
இடம்.

பஸ் மாறி ஏறி
பாதியிலேயே இறக்கிவிடப்பட்ட
முகம் தெறியாத பயணி குறித்த
கவலை.

இடையிடையே நிற்கும் சிற்றூர்களில்
முறுக்கு வாழை திராட்சை
விற்கும் பொடியன்களின்
குரல்.

இவையெதுவும் கிடைப்பதில்லை
முன்பதிவு செய்து பயணிக்கும்
A/C Volvo பேருந்தில்.

அழைக்கலாமா என எத்தனிக்கையில் ..

செல்பேசியில்
சேர்ந்திருக்கும் எண்களை
கடக்கையில் தோன்றும்
பழைய நண்பர்களின்
முகம்.

அழைக்கலாமா என
எத்தனிக்கையில் தடுக்கும்
பால்ய குற்றங்களின்
உணர்வு.

அவனுக்கேனும் நினைவிருக்குமா?

எங்கோ ஒரு
பேருந்து நிறுத்ததிலோ
கூட்ட நெரிசலிலோ
சந்தித்து,
புன்னகைத்து,
கைக்குலுக்கி,
பரஸ்பரம் விசாரித்து
ஆளே மாறிப்போனதாய்
ஆச்சரியப்பட்டு
மீண்டும் எங்கோவொரு
நிறுத்ததிலோ நெரிசலிலோ
சந்திப்போம் என்ற நம்பிக்கையில்
'பார்க்கலாம்டா மச்சான்'
என்று பிரியும்போதும்
கேட்க வெட்கமாய் இருந்தது
மறந்துபோன அவன் பெயரை.

அவனுக்கேனும் நினைவிருக்குமா
என் பெயர்?